2 gra kundër karteleve, e para herë në Meksikë, 2 kandidate për presidente

Meksikanët u janë drejtuar kutive të votimit këtë të diel, për një proces zgjedhor që do të kurorëzojë presidenten e parë grua të vendit.

Dy kandidatet, Klaudia Shajnbaum dhe rivalja e saj kryesore Ksotçil Gálvez janë shumë më përpara kandidatit të vetëm mashkull, Horge Alvarez Majnez.

Qytetarët po votojnë edhe për anëtarët e Kongresit të Meksikës dhe guvernatorët në 8 shtete, si dhe për kreun e qeverisë së Qytetit të Meksikës.

Fushata elektorale është karakterizuar nga sulme të dhunshme, që kanë çuar në vrasjen e mbi 20 kandidatëve në nivel lokal në mbarë vendin.

Shajnbaum, një shkencëtare 61-vjeçare që ka shërbyer si kryebashkiake e kryeqytetit nga viti 2018 në 2023, ka mbështetjen e presidentit në ikje, Andres Manuel Lopez Obrador.

Ky i fundit, në pushtet që prej 2018-s, nuk mund të garojë sërish për postin e kreut të shtetit pasi në bazë të Kushtetutës meksikane, presidentëve u lejohet vetëm një mandat 6-vjeçar.

Lideri popullor, që në sondazhet e fundit kishte një kuotë aprovimi prej 60 për qind, ia ka kaluar mbështetjen zonjës Shajnbaum, pjesë e partisë së tij, Morena.

Por përballë Shajnbaum është senatorja dhe sipërmarrësja Ksotçil Galvez, e zgjedhur nga një koalicion i gjerë partish që ndan dëshirën për t’i dhënë fund sundimit të partisë Morena.

Ajo dhe koalicioni “Forcë dhe Zemër për Meksikën” i udhëhequr prej saj kanë qenë kritikë për rritjen e dhunës që vendi ka përjetuar përpara zgjedhjeve.

Në mitingun e saj përmbyllës, senatorja u tha meksikanëve se, nëse votonin për të do të kishin presidenten më të guximshme, “një presidente që përballet me krimin”.

LEXONI GJITHASHTU:

• Ambasadori britanik në Meksikë i drejton automatikun stafit të tij
• Vritet kandidati për kryetar bashkie në Meksikë