20 vjet nga lufta në RMV, analisti Neziri thotë se shqiptarët atje nuk janë të diskriminuar

Kanë kaluar 20 vjet nga lufta që u bë në Maqedoninë e Veriut, ku shqiptarët kërkuan një përfaqësim më të denjë nga autoritetet shtetërore, dhe t’i jepej fund diskriminimit ndaj tyre.

Lufta ndërmjet ushtrisë çlirimtare Kombëtare, UÇK dhe Ushtrisë së Republikës së Maqedonisë, tërhoqi edhe vëmendjen e faktorit ndërkombëtar të cilët përcollën me vëmendje të gjitha zhvillimet.

Gjithçka u përmbyll me një marrëveshje politike mes forcave kryesore të asaj kohe, e cila u mbajt në Ohër e që prodhoi vendime për zgjidhjen e situatës së krijuar.

Analisti, Xhelal Neziri tha për Euronews Albania se shqiptarët në Maqedoninë e Veriut nuk mund të thuhet se janë të diskriminuar në baza etnike.

“Diskriminime të formave siç kanë qenë para marrëveshjes së Ohrit, nuk janë të pranishme. Kemi një përfaqësim të rëndësishëm të shqiptarëve në institucionet e shtetit,” – u shpreh analisti teksa theksoi se kanë ndryshuar shumë gjëra por, të drejtat etnike dhe çështja e diskriminimit vazhdon të jetë ende temë diskutimi në çdo shoqëri multietnike.

Sa i takon luftës në vitin 2001, për analistin është një çështje që gjithnjë është parë nga dy botë të ndryshme.

Për maqedonasit, siç shpjegoi dhe ai, ngjarja e 2001-shit konsiderohet një evazion i një organizate të armatosur nga Kosova, ndërkohë që për pjesën shqiptare viti 2001 lidhet me një kryengritje për më shumë të drejta në shtetin e tyre.

Kush dhe për çfarë luftoi apo kush dhe për çfarë ra dëshmor, janë pyetje që, sipas Nezirit ende sjellin paqartësi, referuar bazave etnike.

“Ajo që unë mendoj në këtë rast është se pas 20 vjetësh kemi një perspektivë të mjaftueshme kohore për ta analizuar dhe për të dhënë përfundimin, të shkarkuar nga emocionet, të shkarkuar nga ideologjitë etnike, politike me qëllim që të gjejmë një konsensus lidhur me 2001-shin. Personalisht mendoj që 2001-shi ishte rezultat i një diskriminimi etnik të shqiptarëve,” – u shpreh ai.

LEXONI GJITHASHTU: 

• Digjitalizimi i teksteve shkollore, ministria e Arsimit në RMV hedh idenë, grupet e interesit kundërshtojnë
• Kufijtë dhe anëtarësimi i RMV-së, Pendarovski e cilëson katastrofike ndryshimin e kufijve në Ballkan
• Ulje e numrit të infektimeve në RMV, hapen lokalet, priten sërish vaksina