23 raste të reja me COVID-19, harta e infeksionit zgjerohet me Librazhdin

Gjatë 24 orëve të fundit në vendin tonë janë testuar 229 persona dhe 23 prej tyre kanë rezultuar pozitivë me COVID-19. Shpërndarja gjeografike e virusit ka marrë shtrirje të mëtejshme, teksa është regjistruar edhe rasti i parë me COVID-19 në Librazhd.

Në komunikimin e përditshëm me publikun, dr. Marjeta Dervishi nga Instituti i Shëndetit Publik bwri me dije se shpërndarja e rasteve të reja pozitive është si vijon: 16 raste janë identifikuar në Tiranë, 2 në Mat, 2 në Lushnje, 1 në Durrës, 1 në Krujë, dhe 1 rast në Librazhd.

“Nga totali i të prekurve të identifikuar në 24 orët e fundit, 19 janë kontakte të rasteve të mëparshme të konfirmuara pozitive, ndërsa për 4 raste po vazhdon hetimi epidemiologjik.

Në 24 orët e fundit janë testuar 21 personel shëndetësor dhe kanë rezultuar pozitive 2 raste.

Në spitalin infektiv aktualisht po trajtohen 26 pacientë, nga të cilët 4 janë në terapi intensive dhe 1 pacient është i intubuar në gjendje të rëndë.

Në 24 orët e fundit janë shëruar 6 qytetarë, duke e çuar në 857 numrin e të shëruarve.

Nga fillimi i epidemisë janë kryer rreth 16 mijë testime molekulare dhe serologjike. Që nga fillimi i epidemisë janë 1122 raste të konfirmuara, prej të cilëve aktualisht janë 232 persona aktivë me COVID19, kryesisht ne Tiranë, Durrës dhe Krujë.

Vijojnë testimet serologjike tek personeli shëndetësor. Deri tani janë mbi 1450 të testuar me një përqindje të përgjithshme pozitiviteti rreth 9%”, tha ajo.

#COVID19Albania | 23 raste të reja, shkon në 1122 numri i të prekurve.

Mbi 1450 testime serologjike tek stafet mjekësore me një pozitivet rreth 9%. pic.twitter.com/jycxNAMPMh

— coronavirus.al (@al_coronavirus) May 30, 2020