24 orë përpara ndeshjes me Tiranën, një futbollist i Bylisit rezulton me COVID-19

Një ditë përpara rinisjes së Superligës, një futbollist i Bylisit rezulton të ketë dalë pozitiv me COVID-19.

Ministria e Shëndetësisë raportoi mëngjesin e së martës për 21 të diagnostikuar të tjerë me coronavirus, 1 prej të cilëve ishte pikasur në Mallakastër.

Informacione jozyrtare bëjnë me dije se rasti në fjalë ka të bëjë me një futbollist të Bylisit, i cili ka rezultuar pozitiv në testin e parë pas një udhëtimi në Shkodër.

Më 3 qershor pritet që Superliga të rinisë lojën pas rreth 3 muajsh pushim. Bylisi luan të mërkurën ora 17:30 me Tiranën dhe infektimi i një lojtari mund t’i shpërqendrojë edhe më shumë futbollistët.

Protokolli i miratuar nga Federata Shqiptare e Futbollit dhe Ministria e Shëndetësisë, kërkon që për rastet pozitive në botën e futbollit të mos raportohet menjëherë në media, rasti të izolohet dhe kontaktet e tij të testohen.

Për të shmangur bllokimin e mëtejshëm të kampionatit, “nuk është e nevojshme që i gjithë ekipi të vihet në karantinë”.

Kështu situata te Bylisi mbetet për t’u qartësuar, ndërkohë që e sigurt është se tashmë do të duhet të testohen edhe lojtarët e tjerë.

Superliga u pezullua pas 9 marsit, kur u diagnostikua u infektuari i parë me COVID-19 në Shqipëri.

Në atë moment kampionati kryesohej nga Tirana me 53 pikë, ndërsa Partizani ndodhej në vendin e 6-të me 38 pikë, 3 më shumë se sa Vllaznia, e cila deri në javën e 26-të luftonte për të qëndruar në Superligë.

Lexoni gjithashtu:

FSHF përcakton edhe datën e rifillimit të kampionateve të moshave

21 raste të reja me COVID-19 në vendin tonë. QSUT mbetet vatër infeksioni, 6 mjekë të prekur nga virusi në 24 orë