245-vjetori i Pavarësisë së SHBA-ve, Meta mesazh urimi presidentit Biden

Presidenti Ilir Meta i ka dërguar një letër urimi presidentit të Shteteve të Bashkuara të Amerikës, Joe Biden me rastin e 4 Korrikut, që përkon këtë vit me 245-vjetorin e Ditës së Pavarësisë së SHBA-ve.

Në letrën e urimit, të cilën kreu i shtetit e ka publikuar edhe në profilin e tij në Facebook, z. Meta shpreh mirënjohjen ndihmesën dhe mbështetjen që SHBA kanë dhënë për Shqipërinë si dhe vendosmërinë e vendit tonë për të qenë përkrah SHBA-ve si partneri më strategjik.

“Do të dëshiroja të shfrytëzoja këtë rast që t’Ju ritheksoja vendosmërinë e Shqipërisë për të qëndruar krah për krah Shteteve të Bashkuara të Amerikës në të mirë të interesit të përbashkët të dy popujve tanë miq, si dhe për të zhvilluar akoma edhe më tej lidhjet tona strategjike!

Ju lutem Zoti President, krahas urimeve të mia më të mira për shëndetin dhe lumturinë tuaj, të pranoni shprehjen e konsideratës sime më të lartë!” shkruan mes të tjerash kreu i shtetit.

Dita e Pavarësisë së SHBA përkujton miratimin e Deklaratës së Pavarësisë, më 4 korrik 1776.

LEXONI GJITHASHTU:

• “Mësoni nga e kaluara, sytë te e ardhmja”, mesazhi i ambasadores Kim në 245-vjetorin e Pavarësisë së SHBA
• “Defender 21”, Yuri Kim: SHBA ka shpenzuar 35 milionë dollarë në Shqipëri