28 mijë nxënës më pak, arsimi regjistron ulje të numrit të nxënësve në të gjitha ciklet

Numri i nxënësve dhe studentëve të regjistruar në arsim, përfshi edhe parashkollorin, u ul me 4.6% gjatë sezonit 2020-21, ose 28 000 të rinj më pak se vitin shkollor 2019-2020. Kjo prirje vijon prej disa vitesh në vend, ndërsa të dhënat e Institutit të Statistikave zbulojnë se në të gjitha ciklet statistikat referojnë tkurrje.

Ndërkohë, raporti mësues-nxënës në shkollat publike, në ciklin 9-vjeçar u fiksua në 1 mësues për 8.9 nxënës dhe në gjimnaz 1 mësues për 12.7 nxënës. Në shkollat private, ky raport është më i ulët, por të dhënat tregojnë të paktën për arsimin 9-vjeçar se 91.4 % e fëmijëve u regjistruan në shkollat publike.

Më tej në ciklin e mesëm, vihet re një tendencë në ulje për të frekuentuar gjimnazet publike, 86.5 për qind. Ndërkohë, sa i përket arsimtarëve në raport gjinor, janë femrat ato që dominojnë me 78.5 për qind përballë mësuesve meshkuj. Sa i përket shkollave të larta, këtë sezon janë 6000 studentë më pak se vitin e kaluar, por ajo çka vihet re, është tendenca në rritje për të zgjedhur degë të shëndetit.

Ulja e numrit të përgjithshëm të studentëve që ndjekin arsimin e lartë është më e theksuar në fushat “Shkenca natyrore, matematikë dhe statistikë” me 17,4 % dhe “Bujqësi e  veterinari” me 16,8 %. Ulje jo shumë e theksuar vërehet në fushat e studimit “Shërbime” dhe “Inxhinieri, prodhim dhe ndërtim”.