28 vende vakante, KLP thirrje për aplikim për prokuror: Kandidatët do t’i nënshtrohen verifikimit të pasurisë dhe të figurës

Këshilli i Lartë i Prokurorisë ka shpallur thirrje për fillimin e procedurave për plotësimin e 28 pozicioneve vakante në prokuroritë e juridiksionit të përgjithshëm, pranë Gjykatave të Shkallës së Parë dhe të Apelit, për drejtues.

Në njoftimin e KLP-së sqarohet se pas aplikimit, kandidatët do t’i nënshtrohen verifikimit të pasurisë dhe të figurës.

“Në bazë të ligjit ‘Për statusin e gjyqtarëve dhe prokurorëve në Republikën e Shqipërisë’, i ndryshuar, pas dorëzimit të aplikimeve dhe vlerësimit paraprak për  plotësimin e kushteve të kandidimit, kandidatët do t’i nënshtrohen verifikimit të pasurisë dhe të figurës.

Kandidatët që plotësojnë kushtet e sipërpërmendura i paraqesin kërkesat e tyre jo më vonë se 2 javë kalendarike nga data e nesërme e shpalljes së thirrjes në faqen e internetit të Këshillit”, thuhet në njoftim. 

Në organet e hetimit janë krijuar një sërë vakancash për shkak të procesit të Vettingut, pasi shumë prokurorë janë shkarkuar nga detyra. 

Këta të fundit kanë rezultuar me probleme në pasurinë e tyre, pastërtinë e figurës dhe anën profesionale.