30% e krimeve nga të rinjtë, sociologët bëjnë përgjegjës familjen, shkollën dhe shtetin

Vrasja e nënkomisarit Saimir Hoxha nga 21-vjeçari, Aldi Rama nxorri dhe njëherë në pah përfshirjen e të rinjve në ngjarje kriminale. Ky shqetësim është evidentuar edhe nga ana e policisë së shtetit. Referuar statistikave të uniformave blu, në 5 vitet e fundit rezulton se në 30% të ngjarjeve të rënda kriminale të regjistruara në vend janë të implikuar të rinjtë nga mosha 17 deri në 25 vjeç.

Sociologu, Gëzim Tushe thotë se përfshirja e të rinjve në krime lidhet me formimin qytetar të tyre.

‘Sociologët thonë se nëse do të izolonim të rinjtë, 95% e krimit do të ulej. Kjo mund të jetë metaforë, por në të vërtetë edhe në shoqërinë shqiptare pjesa më e madhe e krimeve kryhet nga të rinjtë. Ka një problem shumë të madh që ka të bëjë me formimin e tyre, domethënë me qëndrimin qytetar, njerëz që dinë të vënë arsyen para instinkteve’, shprehet sociologu Tushe.

Për të luftuar këtë fenomen, sociologu shprehet se duhet punuar në forcimin e 3 institucioneve, që sipas tij janë luajnë rol në disiplinimin e të rinjve.

‘Është familja e cila po pëson të çara shumë të mëdha, ulje e cilësisë së prindërimit. Është shkolla, e cila ka një përgjegjësi të madhe në kultivimin e cilësive humane të njeriut për ta bërë një qenie sociale. Dhe e treta është shteti; ato do merren me krimin, por policia nuk mund të zëvendësojë familjen, shkollën’, thotë Tushe.

Krahas ngjarjeve kriminale, përfshirja e të rinjve vihet re dhe në krimet e lehta, si plagosjet me armë të ftohta apo sende të forta. Edhe në këtë kategori përfshirja e të rinjve është tepër e lartë, ku në 5 vitet e fundit rezulton se në 70% të këtyre krimeve janë të implikuar të persona nga mosha 17-25 vjeç.