35 projektligje që nuk u miratuan, nismat që presin kuvendin e ri, mes tyre edhe amnistia fiskale

35 projektligje që nuk janë shqyrtuar përgjatë viteve 2017-2021 priten të diskutohen në sesionin e ri parlamentar në shtator.

Një pjesë e tyre janë nisma të deputetëve, përfshirë edhe ata ligjvënës që nuk do të jenë në parlamentin e ri, ndërsa pjesa tjetër janë nisma të qeverisë.

Një prej nismave që është kritikuar dhe ka mbetur ende në kuvend është projektligji për amnistinë fiskale.

“Do të votohet këtu me 84 vota, që nuk do të ketë shans që të vijë njeri e ta kthejë mbrapsht për arsye politike,” – deklaroi Rama në mars të vitit 2020.

Ndryshimet ligjore janë depozituar në Kuvend më 9 korrik 2020 dhe parashikojnë amnistinë për pasuritë e luajtshme dhe të paluajtshme të padeklaruara nga individët dhe bizneset.

Po ashtu, parashikohet qe amnistia të zgjasë një vit nga miratimi i saj në parlament dhe përcakton se nëse vetëdeklarimi bëhet në muajt e parë, taksimi mbi vlerën e pasurisë do të jetë 5%.

Për shkak të kritikave që pati, nisma është diskutuar vetëm në parim në komisionin e ekonomisë dhe nuk u miratua në sesionin parlamentar që lamë pas, por as nuk është tërhequr nga kuvendi, ndaj dhe pritet të jetë një nga projektligjet që do të diskutohen në sesionin e ri.

Një tjetër projektligj që nuk mori dritën e gjelbër është edhe paketa antishpifje.

Nisma e sjellë asokohe nga qeveria u kritikua nga mediat dhe institucione ndërkombëtare për shkak të kontrollit që do të kishte AMA mbi mediat online, ndaj qeveria u tërhoq përkohësisht.

Pjesë e agjendës së Kuvendit do jetë edhe projektligji i propozuar nga deputetja Fatjona Dhimitri për krijimin e një regjistri kombëtar me personat e dënuar për krime seksuale si dhe projektligji për referendumet në Shqipëri, propozuar nga deputetja Rudina Hajdari në korrik të vitit 2020.

LEXONI GJITHASHTU:

• Reforma zgjedhore rikthehet në Kuvend, opozita del me propozime konkrete
• Gramoz Ruçi mban fjalimin e lamtumirës në Kuvend
• Basha: Në kuvendin e ri, PD rezolutë për gjenocidin serb në Kosovë