Policia arreston një nga autorët e dyshuar për vrasjen e Shkëlzen Kastratit në Fier

Rreth dy muaj pas vrasjes së Shkëlzen Kastratit në Fier, policia ka mundur të arrestojë një nga autorët e dyshuar.

Burime për Euronews Albania bënë me dije se Albert Zaja, 37 vjeç, një nga katër personat e dyshuar nga autoritetet për vrasjen e ndodhur më 1 shkurt në rreth-rrotullimin e Sheqit në Fier, është arrestuar nga Reparti i Neutralizimit të Elementit të Armatosur (RENEA) në fshatin Larushk të Krujës.

Autoritetet dhanë detaje më vonë përmes një njoftimi për shtyp ku u tha se Zeja sapo ka vënë re policinë është përpjekur të largohet. Ai rezulton të ketë qenë i armatosur dhe është munduar ta fshehë armën në baltë.

Përveç Zajës, policia ka shpallur në kërkim si të dyshuar për vrasjen e Kastratit, 42 vjeç:

• Elmir Tufa
• Elson Xheçuka
• Silvio Cara

Policia dyshon se motivi i vrasjes ka qenë hakmarrja dhe se të katër personat e dyshuar janë vrasës me pagesë. Gjykata e Fierit ka vendosur ndaj tyre masën e sigurisë “arrest me burg” mbi akuzën “vrasje me paramendim e kryer në bashkëpunim”.

Autoritetet dyshohet se përdorën për vrasjen një fuoristradë “Range Rover”, që u gjet e djegur në vendin e quajtur “Mbikalimi i Baltzës”. Në të u gjet dhe një armë, me të cilën dyshohet se u qëllua Kastrati.