46% e shqiptarëve duan të largohen, në 30 vite diaspora arriti në 1.7 milionë

Shqiptarët zënë vendin e parë në Ballkan, për dëshirën për të emigruar.

Kjo është gjetja e anketës së barometrit të Ballkanit 2021, ku 46% e të anketuarve nga Shqipëria, dëshirojnë të largohen për të jetuar e punuar jashtë vendit.

Pas shqiptarëve, dëshirën më të lartë për të emigruar e kanë malazezët me 45% , boshnjakët me 39%, Serbia me 35% dhe Kosova me 32%. Maqedonia e Veriut zë përqindjen më të ulët të dëshirës për emigrim në raport me vendet e tjera, me 27%.

Nga shqiptarët që duan të largohen, 69% e tyre preferojnë një nga vendet e Bashkimit Evropian, 26% Shtetet e Bashkuara të Amerikës, 4% vendet e Ballkanit perëndimor.

Papunësia dhe situata ekonomike janë renditur si shqetësimet kryesore që nxisin dëshirën për të emigruar. Në fakt papunësia shihet si problem kryesor në Shqipëri për 69% e të pyeturve, ndërsa shqetësim mbetet edhe kujdesi shëndetësor.

Sipas të dhënave nga instituti i statistikave, numri i shqiptarëve të larguar për të jetuar jashtë vendit gjatë periudhës 1990-2020 arriti në 1.7 milionë persona.

Në dekadën e fundit nga vendi, çdo vit, janë larguar mesatarisht 42 mijë persona, duke e rritur gjithnjë e më shumë diasporën shqiptare.

LEXONI GJITHASHTU:

• Diaspora për Shqipërinë e Lirë: Do të angazhohemi politikisht për të drejtat tona
• Braktisja e vendit, ish-drejtoresha e INSTAT tregon arsyet pse emigrojnë shqiptarët