6% e të shtruarve në spitalet COVID janë të vaksinuar, thotë zv. ministrja e Shëndetësisë

Zv. ministrja e Shëndetësisë Eugena Tomini tha për Euronews Albania se 5-6% e të infektuarve në spital kanë bërë 1 ose 2 doza të vaksinës anti-COVID. Ajo sqaroi se 94-95% e pacientëve të shtruar nuk e kanë bërë vaksinën.

Tomini deklaroi se 44% e targetit prej 2.2 milion banorësh që duhet vaksinuar deri në pranverën e ardhshme kanë marrë një dozë të vaksinës, ndërsa 35% janë vaksinuar plotësisht.

Sa i takon injektimit të një doze të tretë, zv. ministrja e Shëndetësisë sqaroi se situata është dinamike andaj vendimi duhet marrë nga Komiteti i Ekspertëve për Vaksinimin.

“Qeveria shqiptare të paktën në 48 orët e fundit ka qenë në proces të një marrëveshje përkundrejt 500 mijë dozave Pfizer që deri në fund të dhjetorit vijnë në Shqipëri. Aktualisht që ne flasim kemi ofertë më shumë se kërkesë,” – tha ajo ndërsa e cilësoi këtë një faktor që shton mundësinë për një dozë të tretë.

Tomini tha se nuk jemi mbrapa me procesin e vaksinimit dhe se autoritetet do të shfrytëzonin çdo lloj mekanizmi për të vaksinuar popullsinë. Ajo bëri thirrje për çdo person mbi 18 vjeç që të injektohet me dozën anti-COVID.

LEXONI GJITHASHTU: 

• Vaksinimi i fëmijëve, Alimehmeti: Imunizimi vetëm tek ata që kanë sëmundje të tjera dhe jo me detyrim
• Qeveria publikon vendimin për vaksinimin e stafit arsimor dhe studentëve
• Protesta kundër vaksinimit të detyrueshëm, procedohen 10 persona në Tiranë