6 të vdekur e 81 të plagosur nga shpërthimi në Stamboll, arrestohet autori

Të paktën gjashtë persona janë vrarë dhe 81 janë plagosur në një shpërthim në një zonë të frekuentuar në qendër të Stambollit, kanë thënë autoritetet turke.

Shpërthimi ndodhi rreth orës 16:20 me orën lokale të dielën në një rrugë tregtare në zonën e Sheshit Taksim.

Një i dyshuar tani është arrestuar, tha ministri i brendshëm.

Zëvendëspresidenti Fuat Oktay tha më herët se shpërthimi mendohej të ishte një sulm terrorist i kryer nga një grua.

Presidenti Rexhep Tajip Erdogan tha se autorët do të ndëshkohen.

Duke folur në një konferencë shtypi në Stamboll, ai dënoi atë që ai e quajti “sulmin e poshtër” dhe tha se “era e terrorit” ishte në ajër.

Ministri i Drejtësisë Bekir Bozdag u shpreh për mediat turke se një grua ishte ulur në një stol në zonë për më shumë se 40 minuta, duke u larguar vetëm disa minuta para se të ndodhte shpërthimi.

Të hënën në mëngjes, Ministri i Brendshëm Suleyman Soylu tha se një person i dyshuar që kishte lënë bombën ishte arrestuar nga policia dhe akuzoi Partinë e Punëtorëve të Kurdistanit (PKK) për sulmin.

LEXONI GJITHASHTU:

• Shtëpia përfshihet nga flakët, vdesin një grua dhe 8 fëmijë në Turqi
• Kryeministri suedez: Do të përmbushim detyrimet tona ndaj Turqisë