654 shoferë denoncohen nga qytetarët e Tiranës

Qytetarët e Tiranës përgjatë një jave kanë bërë 654 denoncime për shkelje të ndryshme të rregullave të qarkullimit rrugor.

Dy persona janë arrestuar në flagrancë pasi u kapën nga policia për drejtimin e automjeteve në mënyrë të parregullt. Policia bën të ditur se këta persona u kapën pas denoncimit të qytetarëve.

Policia thotë se me arrestimin e këtyre dy personave dhge me ndihmën e qytetarëve, “janë parandaluar ngjarje rrugore që mund të shkaktonin pasoja të rënda, pasi disa drejtues mjetesh, janë denoncuar nga qytetarët se po kryenin manovra të rrezikshme”.

“Prej kohësh, falë bashkëpunimit me qytetarët, Policia Rrugore e Tiranës, po ndjek me kujdes të gjitha raportimet e Komisariatit Dixhital, denoncimet e qytetarëve, postimet e rrjeteve sociale, nëpërmjet të cilave provohen shkelje të ndryshme të rregullave të qarkullimit rrugor, të cilat më pas ndiqen në terren dhe procedohen sipas dispozitave të parashikuara në Kodin Rrugor”, thuhet në njoftimin e Policisë.

LEXONI GJITHASHTU:

• Arrestohen 22 shoferë, policia rrugore masa të shtuara për parandalimin e aksidenteve