7 persona, përfshirë 2 policë, humbin jetën në një shpërthim bombe në një treg në Pakistan

Të paktën shtatë persona, përfshirë dy policë dhe pesë civilë, u vranë në një shpërthim bombe në një treg në Pakistanin veriperëndimor, ndërsa dhjetëra të tjerë u plagosën, tha policia.

Shpërthimi ndodhi në Tehsil Sarai Navrang Bazar, pranë distriktit Banu, jo shumë larg kufirit me Afganistanin, raportoi Reuters. Ekipet e ambulancës dhe zjarrfikësve u dërguan në vendngjarje.

Zëvendësdrejtori i Policisë, Navrang Saeed Khan, tha se të plagosurit rëndë janë transferuar në spitalet në Bani, ndërsa drejtori i spitalit, Mohammad Ishaq, tha se deri më tani janë shtruar në spital 37 pacientë, disa prej të cilëve në gjendje kritike.

Pamjet nga vendi i shpërthimit tregojnë dyqane të dëmtuara dhe një automjet të shkatërruar.

Ky është sulmi i dytë vdekjeprurës në rajon në katër ditët e fundit. 15 policë u vranë në një shpërthim makine pranë një stacioni policie gjatë fundjavës.

Pakistani fajësoi militantët me bazë në Afganistan për sulmin e mëparshëm dhe paraqiti një protestë pranë autoriteteve në Kabul.

Autoritetet talebane thanë se nuk kishin komente mbi akuzat. Islamabadi pretendon se militantët po përdorin territorin afgan për të planifikuar sulme në Pakistan, ndërsa talebanët i hedhin poshtë akuzat dhe thonë se situata e sigurisë në Pakistan është një çështje e brendshme e vendit.