7 viktima nga tërmeti, Hoti i ofron ndihmë me të gjitha kapacitetet Kroacisë

Kryeministri i Kosovës, Avdullah Hoti i ka dërguar një letër kryeministrit kroat Andrej Plenkoviç, ku i ka shprehur keqardhjen për viktimat e tërmetit dhe i ka ofruar mbështetjen e institucioneve të Kosovës për t’u përballur me pasojat.

“Më lejoni të shpreh ngushëllimet e mia më të thella për humbjen e jetëve dhe shkatërrimet e mëdha nga tërmeti që goditi rajonin e Petrinjes dhe u ndje deri në Zagreb e rajone të tjera. Si Kryeministër i Kosovës, unë do të doja të ofroja mbështetjen e Forcës së Sigurisë së Kosovës, si një forcë e shquar dhe e trajnuar mirë në misionet e kërkim-shpëtimit, e cila është e gatshme të ndihmojë qytetarët dhe autoritetet kroate në tejkalimin e pasojave të tërmetit’’ thuhet në letrën e Hotit.

Më tej në letër Hoti ka theksuar gatishmërinë e Kosovës për të ofruar ndihmë me të gjitha kapacitetet Kroacisë. 

“Si vend mik dhe si aleat, Kosova qëndron në solidaritet të plotë me Kroacinë dhe ne jemi të gatshëm të bëjmë gjithçka në kapacitetet tona për të lehtësuar vuajtjet dhe për të tejkaluar sa më shpejtë pasojat e kësaj fatkeqësie natyrore. Populli i Kosovës është këtu për të ndihmuar dhe kjo ndihmë ofrohet me gjithë zemër’’, thuhet në letrën e Hotit. 

Deri më tani tërmeti i fuqishëm që goditi Kroacinë dy ditë më parë, ka shkaktuar 7 viktima. Ndërkohë, ekipet e kërkim-shpëtimit po vijojnë punën në terren, pasi dyshohet se ka ende njerëz nën rrënoja.

Lexoni gjithashtu:

Tërmeti me magnitudë 6.2 godet Kroacinë, epiqendra në Zagreb