70 mln dollarë mbështetje direkte, këtë javë do çelen fondet për dëmet e tërmetit

Ka nisur pastrimi i inerteve të ndërtesave të shembura nga tërmeti i 26 nëntorit. Shijaku është qyteti parë ku forcat e ushtrisë filluan mbledhjen e inerteve, fill pas lirimit të kufizimeve prej COVID-19.

Kryeministri Edi Rama ka bërë me dije se duke nisur nga e enjtja e kësaj jave do të çelen fondet e dëmshpërblimit për familjet me dëmtime të riparueshme të shtëpive. “Do të jenë direkt fonde që do u shkojnë qytetarëve, është një shumë e konsiderueshme. Shuma totale vetëm për xhepin e qytetarëve të dëmtuar shkon në 70 milionë dollar”, tha z. Rama.

Ministri i Rindërtimi Arben Ahmetaj tha se 6 milion dollarë do t’u kalojnë në qershor 1 mijë e 173 familjeve në qytetin e Shijakut, kurse në korrik dhe gusht hapet fondi për Durrësin. Ndërkohë këtë javë priten të lidhen edhe kontratat e para të rindërtimit të Shkollave.

“Janë 22 njësi arsimore. me njësitë individuale Bashkia e Tiranës po ecën në mbylljen e fazës së parë, ndërsa Fondi Shqiptar i Zhvillimit në mbyllje të fazës së dytë. Janë më shumë se 7-8 kompani që përfitojnë nga proceset e hapura ndërkombëtare të prokurimit, kështu  që gjithë rindërtimi do të angazhojë 80-100 kompani shqiptare dhe të huaja”, tha ministri.

Për banesat individuale që kanë marrë dëme të parikuperueshme, Ahmetaj njoftoi se brenda muajit qershor do të fillojë shembja e tyre. “Për Shijakun në fund të qershorit fillojmë procesin në terren, është Bashkia që ka ecur më shpejt me vlerësimin dhe pikëzimin e të gjitha njësive individuale”, përfundoi ministri.