88 vite me Ismail Kadarenë/ Festë në shtëpinë muze, studentët nderojnë shkrimtarin

Shkrimtari Ismail Kadare feston ditëlindjen e tij të 88. Në shtëpinë e tij muze në Tiranë është mbajtur një aktivitet festiv, në të cilën  është diskutuar vepra dhe janë interpretuar krijimet e tij.

Ditëlindja e 88-të e shkrimtarit Ismail Kadare është festuar në një mënyrë krejt të veçantë. Dhjetëra miq, studiues e dashamirës të autorit janë mbledhur në ish-shtëpinë e tij në qendër të Tiranë, në një ceremoni të organizuar nga studentë të departamentit te arteve te aplikuara dhe klubi studentor i letërsisë Kadare.

Ata kanë interpretuar edhe disa prej poezive dhe pjesëve të prozës së shkrimtarit.

Në ceremoni, është mbajtur edhe një kumtesë për rëndësinë e veprës dhe qasjes e të rinjve për krijimtarinë letrare të shkrimtarit.

Ismail Kadare konsiderohet si një prej shkrimtarëve më të rëndësishëm të letërsisë shqiptare dhe botërore. Vepra e tij është përkthyer në 45 gjuhë, ndërsa autori numëron një seri çmimesh të rëndësishme letrare, mes të cilëve edhe Man Booker Prize.