Dita Ndërkombëtare e Demokracisë, ambasada e SHBA shpërndan mesazhin e Anthony Blinken

Në Ditën Ndërkombëtare të Demokracisë, Sekretari i Shtetit, Anthony Blinken shprehet se demokracia dhe të drejtat e njeriut janë në qendër të politikës së jashtme të SHBA.

Në mesazhin e shpërndarë nga Ambasada Amerikane në Tiranë, Sekretari i Shtetit deklaron se SHBA do të vijojë “mbështetjen për demokracinë ndërsa përpiqemi drejt një bote më të barabartë, gjithëpërfshirëse dhe të qëndrueshme”.

“Shtetet e Bashkuara vendosin demokracinë dhe të drejtat e njeriut në qendër të politikës sonë të jashtme; ato janë elemente thelbësore në arritjen dhe ruajtjen e paqes dhe stabilitetit në të gjithë botën. Angazhimi ynë është i fortë dhe i bazuar në përvojën tonë si një demokraci – e papërsosur, por në përpjekje të vazhdueshme për një bashkësi më të përsosur. Ne e dimë se shoqëritë e lira dhe demokratike kanë qytetarë më të shëndetshëm, konflikte më pak të dhunshme dhe komunitete më të begata. Në fakt, demokracia i shërben shumicës, jo pak njerëzve”, thuhet vec të tjerash në mesazhin e Sekretarit amerikan të Shtetit.