Coronavirus: gjysma e njerëzimit në karantinë, teksa 90 shtete bëjnë thirrje për izolim

Më shumë se 3.9 miliardë njerëzve, ose gjysma e popullsisë në botë, u është kërkuar apo urdhëruar nga qeveritë e tyre që të qëndrojnë në shtëpi për të parandaluar përhapjen e COVID-19.

Sipas të dhënave të përmbledhura nga agjencia e lajmeve franceze, më shumë se 90 shtete në botë kanë ndërmarrë masa të ndryshme sigurie duke filluar nga shtetrrethimi, karantina apo rekomandime për vetizolimin e banorëve.

Pas hyrjes në fuqi të shtetrrethimit në Tajlandë, do të arrihet pragu i gjysmës së popullsisë në botë që ndodhet në karantinë.  

Ndërkohë, numri i të vdekurve në Spanjë nga coronavirus i ka kaluar 10 mijë sipas të dhënave të fundit zyrtare të publikuara nga autoritet shëndetësore.

Ky është një tjetër rekord i zi për vendin, me 950 viktima në 24 orët e fundit.

Të dhëna disi më inkurajuese vijnë nga Italia, pas raportimit për një rënie të numrit të rasteve të reja.

Sipas të dhënave të përditësuara nga Departamenti i Mbrojtjes Civile numri i rasteve të reja gjatë ditës së sotme është 2,477 në krahasim me dje ku u regjistruan 2,937 pavarësisht testimit të 5 mijë testimeve gjatë ditës së sotme.

Ndërsa numri i viktimave gjatë 24 orëve të fundit është 760.