Reciprociteti për targat, qytetarët e Luginës së Preshevës mbështesin vendimin e Kurtit

Përdoruesit e automjeteve po heqin targat serbe dhe po vendosin provizoret e Kosovës.

Qindra mijëra qytetarë nga Lugina e Preshevës që prej së martës kanë nisur të pajisen me targat e përkohshme nga Ministria e Brendshme.

Kërkesat ishin të larta, ndërsa procedurat të thjeshta.

Qytetarët që folën për kamerën e Euronews Albania përkrahën vendimin e qeverisë Kurti, por kishte dhe nga ata që kritikuan organizimin dhe mungesën e informacionit në kohë.

“Për mendimin tim është vendimi i duhur se përndryshe nuk merr vesh Serbia nëse nuk e bëjmë njësoj siç na e bëjnë ne shqiptarëve”, thotë një qytetar.

“I arsyeshëm edhe me vend, por parapërgatitja për informim nuk është në nivel, sepse na është dashur të pyesim dikë çfarë të bëjmë ose jemi kthyer pas. Kjo është një mangësi”, shprehet një tjetër.

Pas hyrjes në fuqi të vendimit të qeverisë së Kosovës për zbatimin e reciprocitetit për targat e automjeteve, asnjë makinë e regjistruar në Serbi nuk mund të qarkullojë në territorin e Kosovës pa vendosur targat provizore të cilat kushtojnë 5 euro me vlefshmëri prej 60 ditësh.

LEXONI GJITHASHTU:

• Reciprociteti i targave Kosovë-Serbi, reagon kryeministri Rama
• Bllokimi në veri të Kosovës, Lajçak thirrje të ndalen tensionet dhe të lejohet lëvizja e lirë