FIFA dënon Hungarinë, kundër Shqipërisë luan pa tifozë

Komisioni i Disiplinës në FIFA ka dënuar përfaqësuesen e Hungarisë për t’i zhvilluar dy ndeshjet e radhës, të vlefshme për kualifikueset e botërorit “Katar 2022” pa praninë e tifozëve.

Shkak për këtë vendim janë bërë thirrjet raciste në ndeshjen ndaj Anglisë, ku disa tifozë sulmuan verbalisht disa prej lojtarëve të përfaqësues së “Tre Luanëve”.

Përballja e radhës si pritëse për përfaqësuesen e Hungarisë është ndaj Shqipërisë, çka do të thotë se përfaqësuesja kuqezi do të kërkojë një rezultat pozitiv në Budapest pa praninë e tifozerisë vendas.

Komisioni ka vendosur gjithashtu për Hungarinë një gjobë prej 150,000 eurosh, ndërsa ka paralajmëruar se nëse do të ketë përsëritje të shkeljeve në dy vitet e ardhshme, dënime do të jenë më të rënda.

Shqipëria arriti që të fitonte pak javë më parë 1-0 ndaj skuadrës hungareze në Elbasan Arena dhe në muajin tetor do të luajë fatin e saj për një nga dy vendet e para në “Grupin I”.

Në këtë grup kryeson Anglia (16), më pas vjen Shqipëria (12), Polonia (11), Hungaria (10), Andorra (3) dhe San Marino (0).