Rama takime me krerët e partive kryesore të Kosovës

Kryeministri i Shqipërisë Edi Rama diskutoi sot gjatë vizitës në Kosovë situatën me Serbinë përmes takimeve që pati me krerët e partive kryesore, ku shumicën prej tyre i ftoi për vizitë zyrtare në Tiranë.

Rama takoi kryetarin e Lidhjes Demokratike të Kosovës (LDK), Lumir Abdixhikun, kryetarin e Partisë Demokratike të Kosovës (PDK), Memli Krasniqin, kryetarin e Aleancës Kosova e Re (AKR), Behgjet Pacollin, kryetarin e Aleancës për Ardhmërinë e Kosovës (AAK) Ramush Haradinajn dhe kryetarin e Nismës Socialdemokrate Fatmir Limajn.

Gjatë takimeve nuk u lejuan të merrnin pjesë mediat. Gazetarët u lejuan vetëm në fillim të tyre për të marrë pamje ilustruese.

Abdixhiku falenderoi në emër të LDK-së Ramën për mbështetjen që po i jep Kosovës.

“Raportet ndërshqiptare janë bazamenti i suksesit tonë,” – theksoi Abdixhiku në Facebook.

Qasje të ngjashme pati edhe nga Krasniqi. Kreu i PDK-së i shprehu Ramës vullnetin për të kultivuar raporte miqësore me të gjitha institucionet e Shqipërisë.

Ndryshe nga kryetarët e tjerë, Haradinaj tha për mediat se i kishte folur Ramës edhe për projekt-idenë për ndërtimin e një hekurudhe Kosovë-Shqipëri, të cilën ai tha se është më se e nevojshme për dy vendet.

Kryetari i AAK-së, theksoi për mediat se e mirëpriste idenë e “Open Balkan”, por vetëm pas një njohje të pavarësisë së Kosovës nga Serbia.

Rama viziton sot zyrtarisht Kosovën në vizitën e tij të parë zyrtare në një vend jashtë pas marrjes së mandatit të tretë qeverisës. Gjatë ditës ai zhvilloi takim me kryeministrin e Kosovës Albin Kurti ku u ra dakord që në nëntor të zhvillohet një mbledhje e përbashkët e dy qeverive.

LEXONI GJITHASHTU:

• Shqipëria e Kosova me sekretariat për koordinimin e marrëdhënieve dypalëshe
• Rama i cilëson manovra teatrale angazhimet e ushtrisë nga Serbia
• Kurti mohon të ketë informacione rreth një ndërhyrje të mundshme të KFOR-it në veri
• S’kam pasur asnjë komunikim me Vuçiç për reciprocitetin, thotë Rama
• Serbia s’do tolerojë dhunë ndaj serbëve të Kosovës, thotë Vuçiç