Vritet polici në Lezhë gjatë një kontrolli anti-kanabis

Mëngjesin e sotëm është vrarë me armë zjarri në Ishull Lezhë efektivi i Policisë, Saimir Hoxha.

Gazetari Merin Maçi raporton se efektivi është sulmuar me armë gjatë momentit që bashkë me kolegët po kryenin një kontroll për bimë narkotike në këtë zonë.

Sipas policisë, Aldo Rama dyshohet se është personi që plagosi efektivin, i cili humbi jetën rrugës për në spital.

21-vjeçari, i dënuar më herët për prodhim dhe shitje të narkotikëve, është larguar me makinë nga vendngjarja.

Policia ka rrethuar zonën dhe është vetëm çështje orësh arrestimi i tij.

Në ndihmë të Policisë lokale janë nisur forcat speciale RENEA, grupe të FNSH-së dhe një grup i posaçëm hetimor nga Drejtoria e Përgjithshme e Policisë së Shtetit.