Homazhe për nënkomisar Saimir Hoxha, efektivi i rënë në krye të detyrës

Në Pallatin e Kongreseve kanë nisur homazhet në nder të nënkomisar Saimir Hoxha, i cili humbi jetën një ditë më parë në krye të detyrës gjatë një aksioni anti-kanabis në Lezhë.

Mijëra efektivë policie, zyratarë të policisë e përfaqësuese të politikës janë mbledhur për të nderuar 45-vjeçarin, i cili pritet të shpallet Dëshmor i Atdheut

Të pranishëm në homazhe janë dhe ish-drejtues të lartë të policisë, mes të cilëve Agron Kuliçaj, Aleks Hajdari, Erzen Breçani etj. Homazhet pritet të zgjasin deri në orën 15:00.

Ngjarja e rëndë ndodhi paraditen e së martës në Ishull Lezhë, ku Aldi Rama, 21 vjeç qëlloi me armë zjarri efektin e policisë Saimir Hoxha nga brenda makinës ku ndodhej, ndërsa 45-vjeçari e ndaloi për t’i kontrolluar kartën e identitetit në kuadër të një operacioni anti-drogë.

Pas pesë orësh në kërkim, policia e gjeti të të plagosur rëndë autorin e krimit në kënetën e Lagunës së Vainit në Lezhë.

Ai u transportua në gjendje të rëndë fillimisht në spitalin e Lezhës e më pas për në Spitalin Universitar të Traumave në Tiranë, ku dhe humbi jetën.

Një ditë më parë, ministri i Brendshëm, Bledi Çuçi tha se qeveria ka nisur procedurat për të shpallur ‘Dëshmor i Atdheut’ nënkomisarin Saimir Hoxha, i cili humbi jetën në krye të detyrës.