Shqipëria nënshkruan marrëveshje ekstradimi me Spanjën

Shqipëria ka nënshkruar marrëveshje me Spanjën për t’i hapur rrugë ekstradimit të personave që janë të dënuar dhe kanë probleme me ligjin.

Lajmi u bë i ditur nga ministri i Drejtësisë, Ulsi Manja, i cili shtoi se ky zhvillim i ri dëshmon se ka një besim të shtuar ndërmjet autoriteteve gjyqësore në të dyja vendet.

“Kjo marrëveshje është shenjë e besimit të fortë, ndërmjet autoriteteve gjyqësore në mes të dy vendeve tona”, shkroi ai.

Sipas ministri të Drejtësisë, marrëveshja ka për qëllim të forcojë bashkëpunimin dhe të “përmirësojë institucionin përkatës”, i cili kryen ekstradimin e elementëve me rrezikshmëri sociale, që strehohen në Shqipëri apo Spanjë.

Ai thekson se kjo marrëveshje është një sinjal i qartë për botën e krimit, që kryejnë veprimtari në kundërshtim me ligjin.

“Ky është një sinjal i qartë që tashmë shkon për botën e krimit në marrëdhëniet tona në fushën penale me Mbretërinë e Spanjës”, shkroi ministri në rrjetin social Twitter.

1/3 🇦🇱🇪🇸 Sot në Këshillin e Ministrave i hapëm rrugë lidhjes së një marrëveshjeje të re mes Mbretërisë së Spanjës dhe Republikës së Shqipërisë në fushën e ekstradimeve.

Kjo marrëveshje është shenjë e besimit të fortë, ndërmjet autoriteteve gjyqësore në mes të dy vendeve tona. pic.twitter.com/gLuFMoRS1T

— Ulsi Manja (@manja_ulsi) September 29, 2021

Policia shqiptare dhe ajo spanjolle në fillim të shtatorit  pas një operacioni të përbashkët çuan në pranga 107 persona, të cilët vepronin në fushën e trafikimit të lëndëve narkotike. Pjesa më e madhe e të arrestuarve, sipas njoftimeve, ishin me kombësi shqiptare.

LEXONI GJITHASHTU: 

• Mbi 100 të arrestuar në Spanjë për pastrim parash, drogë dhe armë