Gara për Ballkanin Perëndimor, Jansa: Kina, Rusia, Turqia po investojnë pa kushte në rajon

Vendimi i bllokut për të mobilizuar një paketë investimesh prej 30 miliardë eurosh në Ballkanin Perëndimor me siguri do të jetë i mirëpritur por, në një intervistë për Euronews, kryeministri slloven Janez Jansa, i cili  mirëpriti takimin, thotë se nuk është e mjaftueshme për të konkurruar me shtete si Kina, Rusia dhe Turqia.

“Bashkimi Europian është investitori më i madh në rajon. Është  shumë e rëndësishme që vendet e Ballkanit Perëndimor ta vlerësojnë , por në ato zona ne kemi konkurrentë. Është siç e thatë dhe ju Kina, Rusia dhe Turqia, ata gjithashtu do të vijnë me investime dhe nuk po e kushtëzojnë këtë fakt. Ne po e kushtëzojmë me standardet evropiane, reformat e sundimit të ligjit, çka është në rregull, nëse ka dritë në fund të tunelit. Por nëse perspektiva e anëtarësimit në BE nuk jepet, atëherë unë mendoj se ne do të fillojmë ta humbim këtë garë,” – u shpreh Jansa.

Janë pikërisht këto standarde europiane me të cilat Jansa duhet të përballet në shtetin e tij.

Kryeministri slloven akuzohet për kufizimin e lirisë së shtypit. Vetëm javën e kaluar, drejtori i Agjencisë Sllovene të Shtypit dha dorëheqjen pas një konflikti  për shkurtimet në staf dhe financimin e qeverisë. Presidentja e Komisionit Europian Ursula von der Leyen ka qenë kritike ndaj qasjes së Jansa, por ai thotë se nuk i takon Komisionit të ndërhyjë në këto çështje.

Kjo cilësohet një akuzë e rëndë nga udhëheqësi i shtetit anëtar që aktualisht mban presidencën me radhë të Këshillit të BE-së.

LEXONI GJITHASHTU: 

• Serbi-Kosovë dhe Bullgari-RMV, Macron shpjegon situatën e ndërlikuar të Samitit për Ballkanin
• Rama kritik në Samitin e Brdo: BE po humbet fytyrën në sytë e popujve të Ballkanit Perëndimor
• Merkel: Asnjë nga vendet e Ballkanit s’është gati për anëtarësim në BE