Qytetarët dhe bizneset në Vlorë ankohen për rritjen e çmimit të ushqimeve, bie konsumi

Rritja e çmimit të bukës dhe një të sërë produktesh në Vlorë ka krijuar jo pak problem tek qytetarët, ndërsa pensionistët janë ata më të penalizuarit.

“Çfarë të bëjmë, bukën e merrnim 500 tani e marrim 600, gjithmonë po pasurohen ata që kanë. Janë ngritur të gjitha, bukën do ta marrim se s’kemi çfarë të bëjmë, sikur bukë thatë”, u shpreh një qytetar.

“Është rritur 200 lekë, ne jemi pensionistë, tërhiqemi zvarrë”, tha një tjetër.

Për prodhuesit e bukës kjo periudhë është shoqëruar edhe me ulje të konsumit.

“Ulje konsumi ka, por ende nuk është e matshme nëse vjen nga ngritja e çmimit apo nga largimi i emigranteve. Pasi kjo ulje reflektohet çdo vit ne periudhën fundshtator- tetor”, tha një tregtar.

Në shumë dyqane në qytet ushqimet me listë dominojnë përditshmërinë e qytetarëve.

Sakaq situata është rënduar edhe për baret në qytet. Me ikjen e turistëve, vlonjatët shpenzojnë pak ose aspak, thotë një prej adminsitratorëve të një bari në zonën e Lungomares.

“Rritja e produkteve të shportës patjetër ka ndikuar edhe në rritjen e çmimeve tek ne dhe parashikimet për më tej patjetër do penalizojnë edhe biznesin”, u shpreh administratori.

Për kryetarin e Dhomës së Tregtisë, Arben Breshani në këtë krizë ajo që është e rëndësishme është të ketë një program të detajuar nga ana e qeverisë, jo vetëm për popullatën, por edhe për bizneset.

LEXONI GJITHASHTU:

• Eksperti i ekonomisë: Pagat në Kosovë si në Afrikë, çmimet si në Europë
• Zaev ul TVSH e energjisë për të mbrojtur qytetarët në RMV nga rritja e çmimit