Haradinaj kërkon debat në Parlament për gazsjellësin amerikan

Kryetari i Aleancës për Ardhmërinë e Kosovës, Ramush Haradinaj i ka dorëzuar Kuvendit një kërkesë për debat në lidhje me projektin amerikan për gazin nga ana e Qeverisë Kurti.

Haradinaj shprehet se pohimet se Fondi prej 200 milionë dollarësh i MCC nuk ka qenë i specifikuar për gazin dhe diversifikimin e energjisë, është i pavërtetë.

Sipas kreut të AAK qeveria e Kosovës po refuzon një projekt të tillë duke e cilësuar si “gaz rus”.

Ish-kryeministri i Kosovës thotë se për këtë “projekt janë bërë të gjitha përgatitjet për fillimin e realizimit të tij” dhe se janë kryer “dy studime fizibiliteti që janë financuar me miliona dollarë të taksapaguesve amerikanë”.

“Pikërisht tani kur jemi në fazën e finalizimit të këtij projekti dhe në prag të skadimit të afatit për aprovim të vendosur nga MCC dhe SHBA, Qeveria e Kosovës ka vendosur pezullimin e tij, madje duke e cilësuar gazsjellësin amerikan si gaz rus”, shprehet Haradinaj.

Ish-kryeministri i Kosovës thotë se “çështja e gazit amerikan nuk mund as të mjegullohet e as të spostohet me të pavërteta”, ndaj ka kërkuar debat në Parlament.