Gjykata e Apelit Shkodër 50% funksionale, më shumë se 5000 dosje në pritje

Procesi i Vettingut ka shkaktuar jo pak probleme në mirëfunksionimin e gjykatave në qytetin e Shkodrës.

Në gjykatën e Apelit nga dhjetë gjyqtarë që duhet të ishin në funksion, vetëm 5 prej tyre ndodhen aktualisht në detyrë duke krijuar kështu probleme dhe zvarritje në vendimmarrjen e çështjeve gjyqësore.

Kryetari kësaj gjykate, Fuat Vjerdha për Euronews Albania tha se aktualisht po gjykohen çështje civile të vitit 2018, duke krijuar kështu një tejzgjatje më shumë se 3-vjeçare të këtyre proceseve.

Por kjo problematikë nuk ndodh vetëm në gjykatën e Apelit, pasi nga Vettingu janë shkarkuar gjyqtarë edhe në gjykatën e shkallës së parë.

Nga 14 gjyqtarë që duhet të ishin në detyrë, vetëm 9 prej tyre ushtrojnë funksionin.

Në janar të vitit 2019 u shkarkua nga detyra kryetari gjykatës Arben Zefi, vendim që mori formë të prerë në korrik të vitit 2020 ndërsa në KPA po shqyrtohen akoma proceset e shkarkimit të Albano Çepele dhe Luveda Dardha.

Ndonëse u emëruan 2 gjyqtarë të rinj nga shkolla e magjistraturës në vitin 2020 , sërish u krijuan vende bosh pasi u bë transferimi i 3 gjyqtarëve, Tonin Stërkajt në gjykatën e Apleit në Shkodër, Kostandina Kuro në gjykatën e rrethit Krujë si dhe Irida Kacerja transferuar në gjykatën e Apelit Durrës.

Në 9 muajt e parë të vitit 2021 pranë gjykatës së shkallës parë Shkodër janë regjistruar 4361 çështje të reja civile dhe penale dhe plot 1194 çështje janë të mbartura nga vitet e kaluara.

LEXONI GJITHASHTU: 

• Gjykatat e Korçës në ‘kolaps’ të plotë për shkak të vettingut
• Kolapsi i gjykatave, shkarkimet nga vetingu dhe dorëheqjet e gjyqtarëve bllokojnë proceset
• Gjykata lejon ekstradimin në SHBA të amerikanes së akuzuar për mashtrim