“Lusi” niset drejt qiellit, anija kozmike e NASA-s do eksplorojë orbitën e Jupiterit

Një anije kozmike e NASA-s, e quajtur “Lusi”, u nis drejt qiellit mëngjesin e së shtunës, në një mision 12-vjeçar për eksplorimin e 8 asteroidëve.

Shtatë nga gurët misteriozë hapësinorë janë mes grupit të asteroideve të përfshira në orbitën e Jupiterit dhe mendohet se janë mbetjet e pacenuara të formimit planetar.

“Mendoj se kuptimi i kërcënimeve që i kanosen Tokës është një pjesë kritike e analizimit të asteroidëve dhe sidomos të objekteve afër Tokës. Kjo veçori nuk përbën kërcënim, por ndodhet atje dhe ne mund ta vizitojmë dhe të mësojmë se si të veprojmë”, shprehet Thomas Zurbuchen, administrator i NASA-s.

Misioni i anijes “Lusi” në orbitë u pasqyrua edhe përmes një videoje të animuar, që tregonte dhe asteroidët.

“Pjesa më emocionuese është t’i vizitosh këto objekte dhe të mësosh prej tyre. Natyrisht, kjo është e mundur dhe teknikisht më duhet t’ju them se mundësohet nga një prej orbitave më të çmendura që kam parë në misionet e mia. 12 vjet fluturim nga toka në atë orbitë është absolutisht e pabesueshme”, tha Zurbuchen.

Misioni me vlerë 981 milionë dollarë është i pari që synon të arrijë të ashtuquajturin Rrethimi Trojan i Jupiterit. Bëhet fjalë për mijëra, në mos miliona asteroidë që ndajnë orbitën ekspansive përreth Diellit. Disa prej asteroideve trojanë i paraprijnë Jupiterit, ndërsa të tjerë e ndjekin atë.