Paketa e taksave 2022, rishikohet pragu i TVSH, tatimi mbi pagat e akciza

Pragu i TVSH-së, tatimi mbi pagën, akciza dhe normat tatimore, janë disa prej pikave ku Qeveria e Shqipërisë synon të ndryshojë në buxhetin e vitit 2022.

Një paketë fiskale e qëndrueshme është pjesë e planit të Ministrisë së Financave, për t’u zbatuar në periudhën 2022-2025.

Pragu i TVSH-së, akciza dhe normat tatimore, janë disa prej pikave ku qeveria synon të prekë, duke parashikuar rritjen e të ardhurave tatimore me 3.1 për qind.

Rishikimi i taksave është në linjë me këshillat e Fondit Monetar Ndërkombëtar, që rekomandon thjeshtimin e pragjeve për të gjitha llojet e tatimeve, pasi politika aktuale tatimore ka sjellë evazion dhe padrejtësi në taksimin e drejtë.

Për shembull, pragjet e tatimit të pagës, kanë krijuar mundësi për shmangie artificiale të taksave. Shumë të vetëpunësuar kanë copëzuar deklarimin e pagës në 2-3 vende, për të shmangur tatimin 23% të pagës së lartë.

Në fakt, strategjia për këtë paketë fiskale, u kërkua që në korrik të vitit 2019, por tërmeti dhe më pas pandemia, spostuan aplikimin dhe miratimin e saj për 3-vjeçarin në vijim.

Dokumenti i Financave i është bashkëngjitur projektbuxhetit të vitit 2022, ku thuhet se bizneset e vogla dhe të mesme do të marrin stimuj fiskalë, për t’u ri-ngritur për të tejkaluar krizën e tërmetit dhe pandemisë.

LEXONI GJITHASHTU: 

• Eksperti për projekt-buxhetin 2022: Qytetarët në plan të fundit, faturat e koncesioneve të larta
• Miratohet projekt-buxheti 2022, rritje pagash për disa kategori