‘Open Balkan’, Vuçiç: Pas një viti e gjysmë asnjë pengesë në kufi

Presidenti i Serbisë, Aleksandër Vuçiç deklaroi gjatë konferencës së “Open Balkan” se sot bashkë me Edi Ramën dhe Nikola Dimitrov kanë rënë dakord për të ngritur Këshillin e Zbatimit.

“Ajo për të cilën ramë dakord është se nuk jemi në gjendje ta zbatojmë plotësisht. Kjo është një nismë shumë e madhe e jashtëzakonshme. Nuk u ngrit për shkak të Ramës, Vuçiç apo Dimitrov, por u hap për njerëzit. Ne ramë dakord të ngrinim Këshillin e Zbatimit dhe përbërjen e saktë të këshillit do të biem dakord më vonë”, u shpreh Vuçiç.

Ai theksoi se kanë rënë dakord që njerëzit e tri shteteve për një vit apo një vit e gjysmë do të mund të lëvizin lirshëm, pa asnjë pengesë në kufi. Kjo sipas Vuçiç për të forcuar ekonomitë mes vendeve.

“Kemi vonesa të jashtëzakonshme që i diskutuam, reciprociteti për blerjet e paluajtshme, kjo është diçka që duhet ta zgjidhim shumë shpejt”, deklaroi ai.

Vuçiç nënvizoi se pas festës së Krishtlindjeve do të mbahet edhe takimi i “Open Balkan” në Tiranë, ku do të nënshkruajnë memorandumin për lejet e punës.