Europol shkatërron rrjetin që kontrabandonte pakistanezë nga Ballkani në BE

Europol njoftoi se policia spanjolle ka shkatërruar një rrjet që ka kontrabanduar qindra pakistanezë nga Ballkani në Bashkimin Evropian.

Kontrabandistët kanë marrë kryesisht emigrantë pakistanezë nga kampet e refugjatëve në Bosnjë e Hercegovinë dhe më pas i kanë transportuar ata me furgonë në Itali, ose në disa raste në Spanjë, tha agjencia evropiane e policisë.

Në hetimet që kanë zgjatur me muaj kanë marrë pjesë autoritete të zbatimit të ligjit nga Bosnja, Kroacia, Italia, Rumania, Franca dhe Sllovenia, së bashku me Europol-in dhe Eurojust-in – agjencinë e Bashkimit Evropian për bashkëpunim gjyqësor.

Hetimet kanë çuar në arrestimin e 15 personave në prill dhe maj – 12 prej tyre në Spanjë dhe nga një në Kroaci, Slloveni dhe Rumani.

“Të dyshuarit kanë përdorur furgonë dhe kamionë për të fshehur migrantët e parregullt, ndërsa i kanë transportuar në kushte kërcënuese për jetën”, tha Europol.

Në njoftimin e tyre thuhet se trafikantët kanë kërkuar deri në 20 mijë euro për person për t’i kaluar ata nga Ballkani për në shtetet e BE-së.

Kreu i grupit është arrestuar në Rumani dhe është transferuar në Spanjë.