SHBA për korrupsionin në Mal të Zi: Situatë shqetësuese, vendi drejt zgjedhjeve të parakohshme

Shtetet e Bashkuara janë të shqetësuara për korrupsionin në Mal të Zi. Këtë ka theksuar zv. ndihmës Sekretari Amerikan i Shtetit, Gabriel Escobar, i cili është në vizitë zyrtare në Malin e Zi.

Pas takimit që Eskobar zhvilloi me presidentin e Malit te Zi Gjukanoviç. Ambasada Amerikane në Podgoricë, theksoi se zoti Escobar gjatë takimit “theksoi shqetësimin e Shteteve të Bashkuara për korrupsionin e rrënjosur në vend dhe inkurajoi Malin e Zi që të vazhdojë të luajë një rol konstruktiv në trajtimin e sfidave rajonale”.

Ndërkaq, në një komunikatë të zyrës së presidentit Gjukanoviç, theksohet se bashkëbiseduesit ranë dakord se problemet e paqëndrueshmërisë në rajon nuk mund të zgjidhen pa një perspektivë të qartë të integrimit evropian.

Zyrtari i lartë amerikan do të takohet sot me kryeministrin malazez, Zdravko Krivokapiç dhe me kryetarin e parlamentit, Aleksa Beçiç.

Situata në Malin e Zi mbetet shqetësuese për shkak të krizës që ka përfshirë mazhorancën dhe zgjedhjet e parakohshme në këtë vend duken pranë.