Nisin hetimet pas pretendimeve për një përdhunim të ndodhur në pallatin presidencial francez

Autoritetet franceze po hetojnë mbi një ngjarje që pretendohet se ka ndodhur më herët gjatë vitit në Pallatin e Elizesë, konfirmoi të premten Kryeprokuroria e Parisit.

Një ushtare e pallatit presidencial ka akuzuar kolegun e saj për përdhunim, sipas zyrës së presidentit francez Emmanuel Macron. Të dy kanë qenë stacionuar në Elize, por i akuzuar është zhvendosur më pas nga posti, thuhej në deklaratë.

Zyra e prokurorit tha për Associated Press se hetimet filluan më 12 korrik dhe se i akuzuari është marrë në pyetje por jo si person i dyshuar për ngjarjen.

Pallati presidencial nuk është shprehur mbi ngjarjen pasi hetimet vazhdojnë por deklaroi se sapo “u njoftuan për  rastin morën masa: duke dëgjuar, mbështetur dhe shoqëruar viktimën”.

Gazeta franceze “Liberation” ka raportuar se sulmi ndodhi gjatë një feste largimi të një prej punonjësve, duke shtuar se presidenti Macron kishte qenë gjithashtu i pranishëm. Më tej raporton se ngjarja ka ndodhur në një ndërtesë të sigurisë së lartë, pjesë e kompleksit presidencial.