Arrestohet infermierja në Itali pasi injektoi 45 persona me vaksina të rreme anti-COVID

Një infermiere italiane është arrestuar pasi dyshohet se u ka injektuar vaksina të rreme anti-COVID të paktën 45 personave.

Dyshohet se infermierja i ka hedhur më pas vaksinat në kosh dhe pacientëve u ka ngjitur fasha në krahun e injektuar, në mënyrë që të mos kuptohej se vaksinat ishin të rreme.

Katër prej bashkëpunëtorëve të dyshuar të infermieres janë vendosur në arrest shtëpie, në kuadër të hetimeve.

Hetimi i policisë për rastin e infermieres thuhet se nisi pasi një mjek në një spital të Ankonës dyshoi për veprimet e koleges së tij.

Pamjet e policisë tregojnë infermieren duke zbrazur gjilpërat e vaksinës në koshin e mbeturinave, përpara se të pretendonte se i injektonte në krahun personave.

Pesë të dyshuarit akuzohen për korrupsion dhe falsifikim informacioni. Dyzetepesë persona që dyshohet se kanë marrë certifikatat e rreme të vaksinave janë gjithashtu nën hetim, sipas një deklarate.

Muajin e kaluar, një dentist italian u bë objekt i titujve kryesorë në media, pasi kishte vendosur një shtresë silikoni në krahun e tij kur shkoi për të marrë vaksinën.

Burri më vonë deklaroi se thjesht “po protestonte ndaj vendimit të qeverisë italiane për vaksinim të detyrueshëm për personelin shëndetësor.

Sipas rregullave të reja në Itali, të pavaksinuarit nuk mund të hyjnë në bare, restorante dhe as mund të përdorin transportin publik. Vetëm personat që janë shëruar së fundmi nga COVID-19 janë të përjashtuar nga rregullat e reja të “super green pass”.