Çmimet Oscar do të pranojnë filmat e transmetuar në platformat online

Organizatorët e Çmimeve Oscar kanë thënë se këtë vit do të pranojnë filmat e nxjerrë në platformat online, pas mbylljes së kinemave për shkak të pandemisë.

Ndryshimi i përkohshëm, i cili vlen vetëm për ceremoninë e radhës dhe që do të ndryshohet sërish kur të hapen kinematë, u njoftua përmes një deklarate.

Më parë, në mënyrë që një film të merrej në konsideratë nga Çmimet Oscar, ai duhet të transmetoj më parë në kinematë e Los Anxhelos për të paktën shtatë ditë.

“Akademia e Filmit beson se nuk ka mënyrë më të mirë për të përjetuar magjinë e filmave sesa shikimi i tyre në kinema. Ky zotim i joni mbetet i paluhatshëm. Megjithatë, për shkak të tragjedisë historike të COVID-19, nevoja e kërkon që të bëjmë një përjashtim të përkohshëm për sa i përket rregullave të pranimit të filmave,” tha Presidenti i Akademisë David Rubin.

Platforma si Netflix kanë sjellë një frymë të re në Hollivud, duke tërhequr edhe disa prej yjeve më në zë si Robert De Niro dhe Martin Scorsese.

Kinematë përgjatë Amerikës janë mbyllur që nga mesi i marsit, ndërsa tre rrjetet kryesore të kinemave – AMC, Regal dhe Cinemark – kanë thënë se nuk presin të hapen deri të paktën nga fundi i qershorit ose korriku.