Shtohen fatalitetet nga aksidentet në punë, sektorët më të prekur 

Kushtet e sigurisë në punë as në vitin 2021 nuk janë përmirësuar. Të dhënat e marra nga Inspektorati Shtetëror i punës na bëjnë me dije se viti që lame pas kishte të njëjtin numër aksidentesh sa në 2020-ën.

Mesatarisht në një muaj gjatë 2021-shit janë aksidentuar 15 punëtorë.

Pyetur nga Euronews Albania Inspektorati Shtetëror i Punës thotë se në 77% të punëmarrësve të aksidentuar, shkaqet lidhen drejtpërdrejtë me kushtet e sigurisë dhe shëndetit në punë.

Përgjatë vitit 2021, 32 punonjës kanë humbur jetën si shkak i aksidenteve në punë.

Rënia nga lartësia, moszbatimi i rregullores së sigurimit teknik, rënia në kontakt me energjinë elektrike janë shkaqet e aksidenteve me pasojë vdekje.

Ndryshe nga çdo vit tjetër, aksidentet me pasojë vdekje gjatë 2021-shit kanë ndodhur më së shumti në aktivitetin elektricitet-gaz, ujë.

Nga 32 viktima në total, 8 janë shkaktuar vetëm në këtë sektor. Punonjësit në ndërtim dhe miniera mbeten ende më të rrezikuarit në vendin e punës.

Në gjashtë vitet e fundit, nga 163 punonjës të aksidentuar me vdekje në total, gjysma rezultojnë nga sektori i ndërtimit dhe minierave.

Masat mbizotëruese ndaj subjekteve në shkelje të rregullave të sigurisë rezultojnë se janë detyra për realizim, këshillim dhe paralajmërim.