Shqiptarët e vrarë në Ekuador

Gjashtë shqiptarë janë vrarë në Amerikën Latine gjatë 5 viteve të fundit.

Porti i Guajakilit është epiqendra e përplasjeve të shqiptarëve për trafikun e drogës. Në Durrës gjatë 4 viteve të fundit janë sekuestruar më shumë se 1 ton kokainë.

Prania a e shqiptarëve në Amerikën Latine dhe veçanërisht në Ekuador daton në fillim të viteve 2010.

Në dekadën e fundit ata kanë krijuar familje në këtë shtet dhe po luajnë një rol kyç në trafikun e kokainës.

Ergys Dashi është viktima e katërt e përplasjeve të bandave në qytetin port, Gyajakil.

Ekzekutimet mafioze nisën në vitin 2017 me Ilir Hidrin, për të vijuar me shqiptaro malazezin Fadil Kacanic dhe Adriatik Tresën në 2020-ën, i cili u ekzekutua në një resort luksoz.

160 shqiptarë ishin të regjistruar në Ekuador në vitin 2018 ndërsa numri i tyre besohet se është rritur vitet e fundit.

Të integruar me komunitet edhe falë lidhjeve martesore ata bashkëpunojnë me grupe kriminale vendase për të ngarkuar kokainën në kontejnerë me fruta ekzotike.

Ekuadori nuk është një vend prodhues i kokainës por rëndësinë në trafikun ndërkombëtar ja jep porti i Guajakilit.

Droga vjen kryesisht nga Peruja dhe Venezuela por edhe vende të tjera prodhuese ku gjithashtu shqiptarët luajnë rol kyç si ndërmjetës të dorës së parë.

2 shqiptarë të tjerë janë ekzekutuar gjatë 4 viteve të fundit në Kolumbi dhe Brazil.

Influenca e shqiptarëve në Amerikën latine përkthehet edhe në ngarkesat e kapura në portin e Durrësit.

Nga viti 2018 e deri më tani janë sekuestruar mbi 1 ton kokainë në kontejnerë me banane në disa aksione të ndryshme.

Një pjesë e shqiptarëve të Ekuadorit, synojnë të trafikojnë kokainën edhe në Holandë e Belgjikë në portin e Roterdamit dhe Antverpit.