Nadal në gjysmëfinalen e Australian Open

Janë luajtur sot ndeshjet e para çerekfinale të grand slamit Australian Open, duke përcaktuar edhe gjysmëfinalistët e parë.

Rafael Nadal siguroi një biletë për në gjysmëfinale pas fitores 3-2 ndaj kanadezit Denis Shapovalov, një ndeshje që zgjati më shumë se 4 orë. Spanjolli fitoi 6-3, 6-4 dy setet e para, por nuk e mbylli dot ndeshjen.

Rivali kanadez u kundërpërgjigj duke fituar 6-4, 6-3 dy setet e tjera, dhe duke çuar ndeshjen në setin final. Në këtë set nuk ka histori, pasi Nadal dominon dhe fiton 6-3. Përballë tij në gjysmëfinale do të jetë fituesi i sfidës Monfils-Berrettini.

Te femrat, gjysmëfinalistja e parë është tenistja amerikane Madison Keys. Ajo mundi 2-0 (6-3, 6-2) çeken Barbora Krejçikova. Një fitore e lehtë e Keys, surpriza e këtij turneu, që për herë të dytë në karrierë shkon deri në katërshen e këtij turneu. Ajo pret të mësojë emrin e fitueses që do të dalë nga sfida Barty-Pegula.