Kush janë 3 gjyqtarët që dënuan Tahirin?

3 gjyqtarët që dhanë vendimin për Saimir Tahirin votuan të tre që ish-ministri të shkojë në burg.

Ata nuk janë gjyqtarë të apelit të GJKKO-së, por për shkak të mungesave kanë ardhur nga apelet e rretheve me vendim të KLGJ-së. Maksim Haxhia, avokati i Tahirit deklaroi për Euronews Albania se vendimi është më i cenueshëm kur merr parasysh këtë fakt.

Të tre gjyqtarët e kanë kaluar vetingun, megjithatë Komisioni i Pavarur gjeti disa probleme.

Erigert Pëllumbi, gjyqtar në Gjykatën e Apelit Vlorë mund të ishte i ndikueshëm gjatë ushtrimit të detyrës. Ai kaloi vetingun në tetor 2021.

Igerta Hysi, gjyqtare në Gjykatën e Apelit Durrës rezultoi se kur ushtronte detyrën në Fier, kishte nxjerrë nga burgu një person që kishte lidhje me krimin e organizuar. Ajo e kaloi vetingun në janar 2021 pasi vendimet e saj ishin konfirmuar nga shkallët më të larta të gjyqësorit. Hysit nuk iu gjetën probleme me pasurinë.

Florjan Kalaja, gjyqtar në Gjykatën e Apelit Durrës kaloi vetingun në dhjetor 2020 pa asnjë problem. Ai është me eksperiencë edhe si këshilltar në Gjykatën e Lartë.

LEXONI GJITHASHTU:

• Arsyet që çuan në dënimin e Saimir Tahirit, sipas Gjykatës
• S’komentoj vendimin e gjykatave, thotë Rama për dënimin ndaj Tahirit