​Ngrihen dy aktakuza për helmimet me ujë në Deçan

Prokuroria në Pejë ka ngritur dy aktakuza për helmimin e qytetarëve në Deçan vitin e kaluar.

Aktakuzat janë ngritur ndaj dy zyrtarëve të Kompanisë Rajonale të Ujësjellësit “Hidrodrini”,  kimistes dhe drejtorit të Departamentit Teknik për mungesë të klorit dhe të testimeve të ujit.

“Pas një hetimi intensiv në çështjen penale me rastin e helmimeve të 1500 qytetarëve, sot kam ngritur aktakuzë kundër dy zyrtarëve si persona përgjegjës për veprën penale ‘Mos evitimi i rrezikut’”, deklaroi në një konferencë për media prokurori Durjan Juniku.

Komuna e Deçanit i kishte hequr kësaj kompanie të drejtën e menaxhimit të ujësjellësit vitin e kaluar.

Ndërkaq lidhur me personat e dyshuar të nacionalitet serb, është thënë se kanë përfunduar hetimet dhe ka rezultuar se nuk kanë pasur lidhje me rastin, raporton Kosovapress.

“Në kohën kur janë identifikuar dy personat e nacionalitetit serb dhe kemi marrë të gjitha veprimet dhe kemi punuar me kujdes të shtuar dhe profesionalizëm të lartë. Kemi bashkëpunuar ngushtë edhe me organet e sigurisë, mirëpo në fund ka rezultuar se njëjtit nuk janë të përfshirë me rastin në fjalë”, tha prokurori Juniku.

Në korrik të vitit 2021, rreth 1,500 qytetarë, mes tyre 51 fëmijë, kanë kërkuar ndihmë mjekësore për shkak të problemeve shëndetësore që u lidhën me ujin e pijshëm.

LEXONI GJITHASHTU:

• Helmimi në Deçan, IKSHPK: Uji nga ujëmbledhësi Drenocit është jo i pijshëm