The Economist: Përmirësim i demokracisë në Shqipëri gjatë 2021

Demokracia në vendin tonë është përmirësuar një vit pas pandemisë. Shqipëria u rendit e 68-ta, nga 167 shtete, nga revista “The Economist”, duke u futur në grupin e vendeve me demokraci me probleme.

Kjo do të thotë, se Shqipëria është ngritur në pikëzim për zgjedhje të lira dhe zbatimin e të drejtave të qytetarëve, por vazhdon të ketë probleme me lirinë e shtypit dhe krizat politike.

Këto janë edhe kriteret që vlerësojnë formën e regjimit, ku Shqipëria ka marrë 6.11 pikë nga 10 të mundshmet.

Në vitet parardhëse, vendi ynë ishte nën sundimin e demokracisë hibride, një shkallë më e ulët kjo ku kombinohet regjimi autoritar me atë demokratik.

Në rajon thuajse e gjithë popullsia është nën diktatin e një regjimi si i yni, me përjashtim të Bosnje-Hercegovinës, e cila është në një nivel më të ulët.

Raporti i “The Economist” zbuloi se vetëm 21 shtete udhëheqin në demokraci të plotë, ndërsa më shumë se 1/3 e popullsisë në botë, jetojnë nën regjime autoritare.