Karnavalet e Venecias nën masa anti-COVID, më pak qytetarë në rrugë

Persona të veshur me maska dhe kostume tradicionale marshuan në rrugët e Venecias për të festuar karnavalet.

Megjithatë, këtë herë sheshi San Marco nuk ka qenë i mbushur plot me njerëz.

“Është paksa ndryshe pasi është më qetë. Nuk po shohim shumë festime, por ne do të organizojmë festat tona, ndaj do të jetë qejf”, u shpreh Fiona Spagnuolo, shtetase australiane me banim në Venecia.

Në sheshin San Marco janë të pranishme edhe patrullat e policisë, pasi kufizimet anti-COVID janë ende në fuqi dhe po ashtu tabelat që rekomandojnë mbajtjen e maskës.

“Është paksa e vështirë sepse ka shumë pak njerëz, por ne jemi ende gjallë dhe duam të tregojmë se jemi ende këtu. Është e mrekullueshme. Është shumë bukur. Le të vijnë të gjithë në Venecia, me apo pa maskë”, tha Cristina Verardo, një qytetare gjermane.

Disa nga baret në sheshin historik janë të hapur, por njerëzit janë më të prirur të bëjnë foto në urën Rialto, poshtë të cilës vazhdojnë të qarkullojnë gondolat.

LEXONI GJITHASHTU:

• Vijnë karnavalet e shpresës në Venecia, ikën frika për COVID