OBSH: Duhet të përcaktojmë prioritetet tonë përpara se të kalojmë në fazën tjetër të betejës

Organizata Botërore e Shëndetësisë ka paralajmëruar qytetarët që të mos e humbin vigjilencën, teksa një sërë shtetesh kanë nisur lehtësimin e masave kufizuese.
Testet serologjike paraprake kanë treguar se një pjesë e vogël e popullsisë e ka kaluar coronavirusin, çka do të thotë se “një proporcion i lartë i popullsisë është ende i rrezikuar”, ka thënë drejtorja teknike e OBSH, Dr Maria Van Kerkhove.

Dr Mike Ryan shtoi më tej se ideja e vendeve për të lehtësuar masat, në mënyrë për të arritur atë që cilësohet si “imuniteti i masës”, është një përllogaritje e rrezikshme.

“Kjo është një sëmundje serioze dhe ky është armiku publik numër një”, tha ai.

“Ne duhet të përcaktojmë mirë prioritetet tona përpara se të drejtohemi për nga faza e ardhshme e kësaj beteje”, shtoi Dr Ryan.

Pacientëve po iu duhet një kohë e gjatë për t’u rikuperuar nga coronavirus, veçanërisht ata që vuajnë nga sëmundje të tjera shoqëruese.

“Jo domosdoshmërish qytetarët kthehen duke pasur shëndet të plotë”, tha Dr Ryan, drejtori i programit të emergjencave të OBSH teksa i përgjigjej një pyetjeje për kohëzgjatjen e shërimit të pacientëve.

Sipas OBSH, 40 për qind e rasteve aktuale kanë simptoma të lehta, 40 për qind shfaqin simptoma më të forta (ku përfshihen rastet e pneumonisë) por që nuk kanë nevojë për trajtim në ambiente spitalore, 15 për qind janë në gjendje më të rënduar ndërsa 5 për qind janë në gjendje kritike dhe kërkojnë oksigjeno terapi.