Protesta për Teatrin, Arbër Zaimi: Drejtori i VV-së në Shqipëri u burgos politikisht

Arbër Zaimi, anëtar i kryesisë së VV-së ka komentuar zhvillimet e fundit në Shqipëri, ku një grup artistësh, opozita dhe qytetarët zbritën sot në shesh për të protestuar për shembjen e godinës së Teatrit Kombëtar.

Ai tha se Qendra e Lëvizjes Vetëvendosje në Shqipëri ka qenë mbështetëse e Aleancës për Mbrojtjes e Teatrit, ndërsa shtoi se kreu i kësaj qendre në vendin tonë Boiken Abazi është burgosur me urdhër politik.

“Qendra e VV-së në Shqipëri, prej disa muajsh dhe prej një viti është mbështetëse e Aleancës për Mbrojtjen e Teatrit. Kemi pasur bashkëpunim me të, nuk kemi pretenduar të jemi ne flamurtarët, pasi për këtë jemi të gjithë bashkë. Këto ditë aktivistët tanë ka qenë në protesta dhe aktualisht drejtori i qendrës së Lëvizjes Vetëvendosjes, Boiken Abazi është i burgosur politik”, tha ai.

Ai u shpreh në “Ilva Now” se, zhvillimet dhe veprimet politike në Shqipëri janë tepër dëshpëruese. Sipas tij, protesta e qytetarëve duhet të vijojnë në mbrojtje të kauzave për interesin publik.

“Kjo situatë është dëshpëruese në dy nivele: Niveli i parë është niveli i shkatërrimit të teatrit dhe degradimi i demokracisë, që po shpërfaqet nga ky akt në mes të natës. Protesta pati dhe besoj se protesta do të ketë. Shteti nuk i përket qeverisë, por nënshtetasve. Teatri nuk i përket ndonjë shteti apo artisti, por komunitetit të gjerë. Kjo çështje nuk mund të politizohet”, shtoi ai.