Atentati ndaj Dik Martit, PDK: Ish-prokurori të japë sqarimet mbi pretendimet

Partia që dikur udhëhiqej nga Hashin Thaçi e Kadri Veseli, të cilët tani ndodhen në Hagë, ka reaguar pas raportimeve se senatori zvicerian Dik Marti, është rrezikuar të ekzekutohet nga shërbimi sekret serb.

Nënkryetarja, Vlora Çitaku në një konferencë për media, tha se kjo tendencë e rikonfirmon faktin që Serbia po përpiqet edhe më tej ta njollosë të vërtetën për Kosovën dhe UÇK-në.

“Eshtë krejt e vërtetuar se një orkestrim për njollosjen e luftës së UÇK-së nga po të njëjtat struktura dhe e njëjta mendësi, përmes senatorit Marti ka qenë agjendë e mirë organizuar dhe e qëllimshme, e cila s’ka pasur të bëjë asgjë as me të vërtetën, as me drejtësinë” tha ajo.

Çitaku konsideron se kjo situatë e krijuar, është një shkëndijë fillestare për Kosovën dhe Bashkimin Evropian për të shtruar disa pyetje për të cilat ish-senatori Marti do të duhej të sqarohej.

E pyetur nga Euronews Albania nëse e gjithë kjo mund të jetë një përpjekje e Martit për t’i ikur dëshmisë dhe se si mund të përdoret ky rast në gjykimin e ish-krerëve të UÇK, ajo u tregua e rezervuar.

Megjithate, ajo tha se kjo çështje vë në pikëpyetje tërë klauzolën e aktakuzave të ngritura ndaj ish-pjesëtarëve të Ushtrisë Çlirimtare të Kosovës, do të duhej të prodhonte reflektim edhe tek institucionet e Kosovës, të cilat që nga raportimi i këtij zhvillimi jashtëzakonisht të rëndësishëm, ende nuk kanë pasur asnjë qëndrim.