Tarifa e kufirit bëhet 1 euro, biletat e fluturimit më të lira

Çmimi i biletave të fluturimit pritet të jetë më i lirë, pasi qeveria ka vendosur të ulë nga 10 në 1 euro për pasagjer taksën e kufirit.

Më 8 prill, Ministrja e Financave Delina Ibrahimaj dhe ajo e Infrastrukturës Belinda Balluku, kanë miratuar një vendim të përbashkët për uljen e kësaj tarife për të gjitha kompanitë që ofrojnë shërbimet e fluturimeve, të cilat e vilnin taksën te çmimi i biletës.

Vendimi do të jetë në fuqi për të gjithë aeroportet, Rinasin, Kukësin dhe atë të Vlorës pasi të nisë operimet.

Buxheti do të humbë të paktën 12 milionë euro nga ky vendim.

Një vit më parë të ardhurat tatimore nga tarifa e kufirit ishin 11.8 milion euro, dhe 6.6 milion euro në vitin e pandemisë 2020.

Humbje nga ky vendim do të ketë edhe koncesionari i Aeroportit të Tiranës, pasi vjel 2% të të ardhurave si agjent tatimor që mbledh tarifën.

Taksa e kufirit ishte e vendosur përpara 2 dekadash, po nëse në pikat kufitare tokësore dhe detare ajo u shfuqizua vite më parë, në aeroport kishte mbetur në fuqi.

LEXONI GJITHASHTU:

• Ministrja Balluku: S’ka faunë në zonën ku po ndërtohet aeroporti i Vlorës