Kryeministri Rama tregon datën kur do të hapen kufijtë dhe plazhet

Plazhet publike në vend do të vazhdojnë të jenë të mbyllura deri më 10 qershor. Kryeministri, Edi Rama duke bërë të ditur masat lehtësuese, deklaroi se plazhet e hoteleve në vend do të jenë të hapura që nga 1 qershori, datë kur do të hapen dhe kufijtë me vendet e rajonit

“Nga 1 qershori hapim kufijtë tokësor me vendet fqinje tonë. Plazhet ende jo! Nuk kam ndërmend të bëj të mirin për t’i hapur rrugë të keqes. Nga 1 qershori do të hapim plazhet vetëm për hotelet dhe pas 10 qershorit për të gjithë”, tha z. Rama.

Kryeministri u shpreh më tej se, këtë javë do të punohet për lirimin e plazheve të zëna në mënyrë të jashtëligjshme ndërsa tha se, plazhet do të jenë të hapura nga 10 qershori.

“Këtë javë do të ngrihet një autoritet i përhoshëm liçensues i plazheve nga subjektet private, ndërkohë që të gjitha të ardhurat do t’u kalojnë bashkive. Asnjë kontratë nuk do të njihet nëse nuk miratohet nga ky autoritet dhe asnjë bashki nuk mund të japë kontratë të re pa miratimin e autoritetit”, u shpreh ai.

Sipas Ramës, Shqipëria është gati të hapë dhe kufijtë ajrore me vendet e Bashkimit Evropian, por kjo do të kërkonte miratim të dyanshëm dhe se nga ana tjetër vetë BE e ka mbyllur zonën Shengen deri më 15 qershor.